ليه البكا ليه الدموع
قلبى اللى كان عاشق هواك
يبات حزين بين الضلوع
أنا مش بعاند فى القدر
كفايه دمي ال اتهدر
خليك مكانك اسمعك
بتمشى تهرب م الكلام
باعلي صوت اصرخ واقول
كان نفسي اعيش
فكرك بعادي وقتها
كان جهل مني
كمان حصل
طب اعمل ايه
وانت اللي كنت وقتها
فرحان بوجعى و كسرته
لا شفت قلبي ال اندبح
ماشى ف جنازته وزفته
بإيديك توديه لآخرته
كان غصب عني
حتي الوردة
كان شوكها جارح
فستاني منقوش بالسواد
لون حداد
لو كنت قادرة وقتها
ماكنت سبت القلب مات
ازاي تعيش بعدى كدا
وانالسه حاسة انى
معاك
تعيش بعيد
قلبك جليد
وقلبي يتنفس هواك
مش لوحدك شفت كسرة
انا جربت النار والحسرة
كنت دبيحه
صوتى متكتف
عينى مفتوحة
لكن مش شايفة
مش باشرح لك
علشان اصعب
ولا تقول لى
اني ضحيه
شوف دمي السائل ع الارض
ياما اترجيت ان أنا ا بقي
شفت ازاي بقي ظلم الاب
باعني بورقة وختم وبصمة
باعنى رخيص
ولاهمه عذابي وبكايا
متكربجة بالهجر وضايعة
متقطعة بالظلم حشايا
لو شفت القلب المتغصب
كان وقتها كان ممكن يفرق
مرة معاك
والباقى معايا
كلمه أخيرة راح اقولها لك
وانا بحلفك لك
الف يمين
أنا مش حاسه ان أنا عايشه
ومشاعرى بتتلقى عزايا
ممكن تسمع
ممكن تعرف
عمر البعد ما يبعد قلب
ولا بيغير نهج الحب
لا بالعكس
بتزيد جوانا الاشواق
عزة أحمد أبو زيد – مصر